Олон хүн детокс гэхээр зөвхөн элэг гэж боддог. Үнэндээ элэг бол биеийн байгалийн хоргүйжүүлэх тогтолцооны зөвхөн нэг хэсэг юм. Элэг боловсруулсан бодисыг биеэс бүрэн гаргахын тулд гэдэсний хэвийн үйл ажиллагаа зайлшгүй хэрэгтэй.

Та гэрээ цэвэрлээд бүх хогоо уутанд хийчихлээ гэж төсөөлье. Гэхдээ тэр уутаа гадагш гаргахгүйгээр үүдэндээ тавьбал гэр бүрэн цэвэр болсон гэж хэлэхгүй шүүдээ. Үүнтэй адил элэг хэрэггүй бодисыг боловсруулсан ч, гэдэс түүнийг үр дүнтэй гадагшлуулахгүй л бол зарим нь дахин цусанд шимэгдэж боломжтой.

Элэг яг юу хийдэг вэ?

• Илүүдэл эстроген зэрэг дааврыг боловсруулна.
• Эмийн үлдэгдлийг задална.
• Зарим химийн бодис, орчны бохирдуулагчийг хор багатай хэлбэрт хувиргана.
• Эдгээрийг цөсөөр дамжуулан гэдэс рүү ялгаруулна гэхдээ энэ бол процессын зөвхөн эхний шат юм.

Гэдэс ямар үүрэгтэй вэ?

Элэгнээс цөсөөр ялгарсан бодисууд гэдэс рүү орсны дараа:

• эслэгтэй холбогдох,
• өтгөнтэй хамт гадагшлах ёстой байдаг.

Хэрэв гэдэсний хөдөлгөөн удааширсан, өтгөн хаталттай, эсвэл гэдэсний бичил биетний тэнцвэр алдагдсан бол боловсруулагдсан зарим бодис дахин цусанд шимэгддэг. Үүнийг гэдэс-элэгний дахин эргэлт (enterohepatic recirculation) гэж нэрлэдэг. Өөрөөр хэлбэл элэг нэгэнт боловсруулсан бодис дахин элэг рүү буцаж ирэх тул элэг илүү их ачаалалтай ажиллах шаардлагатай болдог.

Гэдэсний хэвийн үйл ажиллагааг дэмжихэд:

• хангалттай эслэг
• усны зөв хэрэглээ
• тогтмол бие засах
• ашигтай бичил биетнийг дэмжих хооллолт
• хөдөлгөөн маш чухал үүрэгтэй.

Иймээс элэг нь хэрэггүй бодисыг боловсруулдаг, харин гэдэс түүнийг гадагшлуулдаг.

Иймээс биеийн байгалийн хоргүйжүүлэх тогтолцоог дэмжихийн тулд зөвхөн элэгний үйл ажиллагааг бус, мөн гэдэсний эрүүл мэндийг хамтад нь анхаарах шаардлагатай. Энэ хоёр эрхтэн хамтдаа ажиллаж байж биеийн хоргүйжүүлэх болон гадагшлуулах процесс үр дүнтэй явагддаг.